Tati Gürü mülelu lelfün mew yegeparki Wenu Mapu mew. Nierki kiñe wenüy feytimu. Ti wenüy mülelu Wenu Mapu mew feypirki:
-“¡Llemeafiñ tañi wenüy llallitupayal!” Fey amurki.
-¡Mari Mari wenüy!
-Llepapeyu tami llallitupayal tañi Ruka mew.
-¡Mari Mari!
-¡Amuan llemay! ¿Welu chumgechi pürayayu?
-¡Txomu mew ka! Fey pürarkigu pütxuñmamerki.
Fey rakizuamrumey ti chi Gürü: “Zew pütxuñmapan amupetulayan wüla”.
-¿Chumal amutuaymi? Pieyu ñi wenüy.
-Pütxün küzaw nien üyew nag mapu mew. pirkey ti Gürü.
-¡Amuturkeaymi may-
- ¡May Feman!-Pita gürü. ¿Chumgechi nagtuan chi? ¿Gelay txomü rume?
-¡Kiñe zef mew ngaymi ka!- Pieyew ñi wenüy.
-¡Putulmi mapu mew! ¡Akutun ¡ piaymi. Pieyew ñi wenüy.
Trapelkunugerki tichi Gürü.
-¿Putuymi? pieyew ñi wenüy.
-¿Petu pulan? pirki tichi Gürü.
-¿Putuymi?
-¿Petu pulan? Pirki ti weza Gürü.
-¡Feyta petu pulay ti Gürü! Pirki ñi wenüy. Nag mekelu ñi zef mew. Ka ramturkefi.
-¿Putuymi Am Gürü?
-¿Petu pulan? Mute Allkeñgewelay.
-¿Puymi?
-¿Petu pulan? fey allkeñgewelay.
-¡Zew putuy! pi ñi wenüy . fey neykunugerki, fey tranalewepay.
-¡Nawezalkarkeenew ñi wenüy! Ina rüputranalewepuy.
-¿Chuman chi? ¿Allfüperkelay ñi llike? Fey mekey ñi Güman.
Fey txanalelu,ruparumerki ñi MalleTxapial.
-¡Mari Mari Gürü! ¡ ¿Chumgelu amta txanaleymi?
-¡Kiñe Mamüll mew tuntukuwün! Koylaturki ti Gürü.
-¡Weñemewfun kiñe achawall! Fey pegen, kupaf gen ¿allfüperkelay ñi llike?.
-¿Chumayu chi? Pirki ti malle Txapial.
-¿kelluan amka? Pi ti Gürü.
-¡Kelluayu llemay! ¿Llemean ta machi? Pi ta Malle
Akurki epu machi, Rakiñ erke ti pu Machi.
-¡Fawpüle! Pirki ta Malle.
-¡Alung ürki! Pi ta Machi ¿Welu wetxorkelay?. Lawentueyu ti Machi, fey txemotuy ti Gürü, machituñmagelu ñi kutxan.
“Meli Txipantu lalu Txemolgefiñ Meli Txipantu lalu Mogelketufiñ” Pigün ti pu machi Rakiñ. Fey txemo txipay ti.
-¡Chaltu may Machi! Pirki ta Malle, amutulu ti pu Rakiñ.
Witxafemtuy ti, tremofemturki..
-¡Zew txemotun! Pi ta Gürü. ¡Rume kümeletun!
¡Feula ke ta nümean kiñe ufisa! ¡Uyew pütxüley! ¿Güñuleymi? Ramtuy Gürü.
-¿May Güñülen? Pi ta Malle.
¡“Amuge eymi”! ;pingerki ta Gürü ¡iñche miñche külantu mew mülean!, pi ta Malle.
Amurki ga ti Gürü lloftumealu kiñe ufiza, welu pütxülerki koñin ufiza. Fey tolongkunugey ti gürü ¡Wagk! txipay txanaletuy.
Fey amuturki gürü ñi Malle mew.
-¿Llemelaymi am? Ramtuy ga Malle.
-¡Tongkaenew ti ufiza! ¡Watxolenu ñi kazi yem! Pi ta Gürü.
-¡Chemu rume pulaymi! ¡Iñche yemechi kiñe ufiza! Pi ta Malle.
Fey yemerki kiñe ufiza ti Malle.
Fey ti Malle ilotukonküli. Fey ti Gürü adkintumekefi
-¡Pichilen anay Malle! ¿Külen rewall anay? Pi ta Gürü.
-¡Fey iñche zoy kümentukefiñ ta külen! Pi ta Malle.
-¡Pilun rewall anay Malle!
-¡Fey zoy Küme ilo ipel! Pi ta Malle.
-¡Külche ke ta eluayu! Pi ta Malle. Fey ti zoy fürechi külche elugerki ta gürü.
-¡Ah! ¡Na furerki ta eluetew tañi Malle! pirki ta Gürü.
-¿Chem pi mi am Gürü? Ramtuy ta Malle.
-¡Ña kümerki ñi eluetew Malle! pi ta Gürü.
-¡Eluwaymi may Gürü! ¡Elelmeafimi ilo pichikeche! Pi ta Malle, meli pichikeche nierki ta Malle.
-¡Yelafiñ yemay! Pi ta Gürü.ayiwürki ta Gürü. Kiñe pichi külantu mew kom ifi ta ilo, re foro yelfi ti pu pichikeche.
Fey amurki ta Gürü yelafilu iyael pu pichikeche panküll. Fey epe puwlu ti pichikeche mew, witxarki “-¡Yenien ilo ta! ¡Kiñe kope pe! ¡Kangelu kütxaltu pe! ¡Kangelu kütxaltupe! ¡kangelu anüntukupe challa! ¡Zoy küzaulu, zoy iyai! Pi ta Gürü.
-¡Itxokom azkintulepe challa mew! ¡Chuchi wazküy pilu! ¡Zoy iyai ilo! Pi ta Gürü.
Fey azkintulerki challa mew ti pu pichike panküll. Fey kagelu ¡Wazküy! Pi ga ti panküll. Fam tu ku fi ragi challa mew ti Gürü. Kiñe fey rügkütxipay fey püray kiñe aliwen mew.
-Gümapuy-¡Ah! ¡Yenmarpaenew tañi pu pichikeche peñi yem!
-¡Ah!¡ Kiñe Wentxu witxa pilun tuli row row külen tuli! Pi ta ti pichi panküll ñi Güman mew.
Fey kangelu lelfün mew , Malle ta ramtukaumekey.
-¿Chumgelu chi ta Gürü akulay? Fey amuy pemefi ñi pu pichike panküll. gümagümagerki kiñe panküll kiñe aliwe
mew.- ¿Chumimi am? ¡Naupage! Pi ta Malle.
-¿Femlayan ka nüafenew? -¡Rupay kiñe Wentxu row row külen tuli ka witxa pilun tuli lagüpafi ñi pu pichikeche peñi peñi künu!
-¡Fey timu mülege may, iñche llemeafiñ! Pi ta Malle.
Fey amurki ti Malle kintumeafulu ti Gürü, amurki rüpü püle perumefi kiñe txiuki ramturkefi:
-¿Pefimi gürü kay Txiukü?
-¿Azkintulan? ¡Ñüzüf tu le pen wiya fütxa gan txipay, kewan kü tu txipay, fey mew ñüzüftupen ñi takun! Pi ta Txiukü.
-¡Kintu piru pen pilaymi! Pi ta Malle.
Ka txekaley rüpü mew ti Malle, fey pefi ta kanin.
-¿Pefimi Gürü kay Kanin? Ramtuy Malle.
-¿Pelafiñ? ¡Küchalongko pen! ¡Azkintulan rüpü püle! Pi ti Kanin.
Amuley rüpü mew ti Malle pe rumefi kiñe Füzü.
-¿Pelafimi Gürü kay Füzü? Ramtuy Malle.
-¿Pelafiñ? ¡Iñche zeumapen tañi pollera!
-¡Ah! ¡Pukelay tami pañu pollerapel! Pi ta Malle.
Fey ka amulelu perki kiñe Pilmañken ka ramturkefi.
-¿Pelafimi Gürü kay? ¿Pilmañken?
-¿Ah? ¡Fey timu koni!
Petu konüki kiñe lolo mew ti Gürü. Fey katxü külen ürkefi ti Malle. Chew ñi mülenwe pu Chinge fey mu mülenawürki Gürü.
-¡Rüf txipapalmi rüf iyafiñ! Pi ta Malle.
-¡Ah! ¡Ah! ¡Poy küchüwün any! Pi ta Chinge.
-¡Küpage iñche txarüm elayu! Pi ta Malle.
Füta perkükünugerki, txanapufemürki Malle. Txanalewi ti Malle. Fey txiparki Gürü wente Malle rünküyawi “¡Nen wüla”!
"¡Nen wüla Füta Malle! Pi ta Gürü".
Fey nepe rumey ti Malle. Külentufemfi ga.
Ka txipay kiñe Chinge .
-¿Mülepuy Gürü eymi mew? Ramtuy Malle.
-¡Kangelu mew müley tati! Pi ta Chinge.
-¡Ay! ¡kütxankülen tati! ¡Ay! Pi ta Chinge.
-¿Chumimi am? Pi ta Malle.
-¡Poy küchüwün tati itxokom kutxanküleiñ tati!
-¡Küpage iñche txarümelayu!
Fey perkükunugerki ti Malle txanapufemüki.
Ka txiparki Gürü lefmawi chew ñi amun amuy. Fey Malle afeluwi. Zugurkefuy ini rume müleiñ pilayu rume.
Fey ta füta Malle amuturki ñi Panküll mew fey mew afi tati afken.
